部落冲突v8.67.9破解:老窦有嘢讲

老窦有嘢讲2011年06月17日 街坊话事
 □江躲躲

　　小江:老窦,父亲节就到,你要咩礼物?

　　老窦:我要话事权!

　　小江:你有嘢就讲喇,整色整水噉。

　　老窦:我要列出你嘅三大罪状。

　　小江:有冇咁多啊,你唔好乱噏喔,你女我都有话事权口架。

　　老窦:听住喇,第一,你成日要我等你。等你出世就等咗十个月,等你叫我老窦就等咗成年,到你返学嘞我又要等你放学,等你做晒作业嘞我先瞓得,等到你读大学我又要等你嘅电话,等你毕业嘞我又要等你嫁!

　　妈子:系吖,你读大学嘅时候,你老窦连买衫都话要等你返嚟帮佢拣。

　　老窦:第二,你逼我做啲我唔钟意做嘅嘢。细时去到边都要我抱你,睇大戏又话要骑膊马,去游水又扯住我去儿童池,重要踩住我对脚跳华尔兹,你毕业点解重要我戴四方帽?

　　妈子:唔好听佢讲啫,佢都不知几钟意你顶四方帽,遮得住佢个光头。

　　老窦:唔好插嘴住,我未讲完口架。第三,你系破坏王,有破坏冇建设。打烂我只奖杯都算喇,重话要帮张奖状冲凉,攞我嘅须刨去刨仙人掌。

　　小江:老窦,睇嚟你都收收埋埋好多怨气。

　　老窦:唔系你估,成日同你妈子一个鼻哥窿出气,激死你老窦我。

　　小江:噉妈子十月怀胎,系大晒口架。

　　老窦:你都唔知佢大肚我要受几多罪,最难顶嘅系补品唔见落我肚,符水炉灰我就饮唔少,食得唔好嘥喔,其实就当我系垃圾桶。

　　妈子:系嘞,最辛苦系你,噉而家个女咪问你父亲节点过啰。

　　老窦:日日都系噉过口架啦,鬼叫我系佢老窦咩。阿女,我周末去霸位饮早茶,你记住早啲起身。