魔兽7.0战士输出天赋:回忆老市长——原广州市长黎子流

讲起黎子流，对于我地90后真系好模糊，甚至好陌生。我第一次听说呢个人系喺父母亲戚谈论嘅时候了解到噶！当时流行住一句粤语口头禅：“得就得，唔得就翻顺德！”（意思就系改革唔成功我就翻乡下！）就系出自于黎子流嘅口中！而且唱到家喻户晓！
一位普通嘅顺德基层干部，到江门市委任职，再到广州任代市长，市长。而且无高学历等头衔，遭到不少质疑。历任嘅市长都系重量级嘅干部。一个土改嘅农民头担任大城市嘅市长系史无前例噶。
在任期间，黎子流切身体会到广州市出现嘅民生问题，都能够着力解决。刚上任时解决电荒问题。“停生产都要保民用！”“一年之内唔解决民生用电嘅，我翻顺德！呢个就系‘的就得，唔得就翻顺德’嘅来历！”多年从事基层工作，可见佢对解决呢个问题嘅决心！
美国有个“三藩（烦）市”，广州不止“三烦”！有好几个烦，其中一个最严峻，至今都未解决嘅就系交通堵塞嘅问题。黎子流本人都切身体会过，一条东西走向嘅双向八车道主干道，人多车多，死咁塞车。广州缺少立体交通，佢仲好坚决感讲：“不能没有地铁！”
广州对地铁问题已经研究左40年，缺乏资金、技术一直未解决！准备退休嘅黎子流坚决要解决！当初为左地铁建设嘅问题，到处拆迁，因此有左“黎拆楼”呢个花名。据老一辈嘅回忆，当佢地嘅旧房子将要被拆嘅时候都会感叹：“黎拆楼了（来拆房子了）”
相比黎拆楼嘅城市建设拆迁，宜家嘅拆迁真系太杯具了，都唔知系建设定系翻新，而且系直对广州最地道嘅老城区老建筑落手，搞到人心惶惶···拆左城市嘅传统，建设新城区，究竟城市嘅根城市嘅魂喺边？难道广州喺外地人嘅眼中就系一个经济发到，到处都系高楼大厦嘅大城市！？

经过4年嘅努力，广州地铁一号线终于系1997年西朗到黄沙试运行，当时读小学嘅我都跟屋企人免费试乘过！当时就系我第一次坐地铁了。广州地铁一号线嘅正式运营标志住广州进入左城市地下轨道交通嘅时代，为日后嘅其它地铁线奠定左基础，黎子流可谓广州地铁嘅功臣。当时最早开通嘅一、二号线只局限于东西 南北走向嘅两条线，覆盖嘅地区有限，所以当时地铁对于大部分人黎讲就好似去“旅游”感。几年开通嘅新线路都大部分覆盖老城区，唔单只搭公交，就连搭地铁都系出行必不可少嘅交通工具。未来嘅地铁发展，将会向周边卫星城发展，缩短市区到周边地区嘅时空距离！广佛、4号线3号线机场线就系一个个好例子！

关于地铁有个小插曲，我唔记得喺边一年睇嘅报纸报道噶，卸任广州市长几年后嘅黎子流同随从一齐重温当年嘅地铁时光，如今嘅地铁都好似地上嘅公交感人逼人，而两位七旬嘅地铁“元老”却默默感企住喺车厢度，喺度谈论当年嘅辛酸岁月。而全过程，却无一个市民让出佢地嘅座位比功臣坐···因为，宜家嘅广州多左好多外地人，而且新一代嘅广州人都唔会认识呢为曾经嘅老市长。

以前北方流传一句话 “天不怕地不怕，就怕听广东人说普通话。”每当听到黎子流讲住唔咸唔淡嘅普通话，真系觉得好好笑，笑到我眼泪都流埋，但系老一辈嘅人听到，真系好有亲切感！讲真，我都觉得！例如“自觉（发“拒绝”音）接受监督”“南海舰队（南海“烂”队）”“女士（“女婿”）们先生们”“花该砖（普通话“地砖”系无“阶转”呢个读法噶）”“你几楼？（黎子流）”详情睇果个纪录片先有意思，文字表述唔觉得好笑···
佢因为自己读唔准感嘅原因而推普，但推普有佢嘅客观存在意义，毕竟全中国系要有一种语言系全国通噶。但推普并唔系意味着扼杀本土语言！近年来因为推普嘅原因而搞到沸沸扬扬，因为对推普意义嘅误解而落出黎嘅政策有开始侵蚀本土语言嘅意思···而新一代嘅广州人自小学开始就被扼杀母语交流嘅权利问题，而且系一个非常严峻嘅本土文化问题。推普有一定嘅积极意义，呢个系肯定嘅，但强行扼杀就违背左尊重本土语言文化嘅权利！如果唔系粤语系喺世界有一定嘅影响力，我淋真系好容易被推晒···
昔日嘅农民市长，已经成为成为顺德嘅农业董事长，为农业现代化作贡献。回首当初，黎子流真系值得我地新一代广州人去认识，去尊敬！以为好党员，好干部，为广州嘅发展挥洒住汗水，实事求是嘅工作态度真系值得当代领导者去学习。相比宜家嘅“600帝”连民生问题都未解决居然口出狂言，租珠江帝景“宿舍”，我觉得真系好唔应该！以为现代化经济建设，我地本土嘅野却抛于脑后。
黎子流解决左好多问题，当初嘅民生用电，经济发展，珠江新城，广州地铁。仲有佢生动嘅“黎式语言”令北方人听到一头雾水嘅普通话，老广州都听到耳熟能详！别有一番亲切感！如今嘅出行方便，虽然地铁问题解决后都系好大人流，但如果广州无地铁，广州嘅公交翻几倍都系日日逼爆车。

“领导是暂时的，做人是永远的，朋友是永远的！从领导岗位上下来，我只是回到了民众中间，没有失落感可言，倒是比原来过得更充实了!” 黎子流钟爱唱粤剧，喺领导干部中系非常少有噶，唱一曲可以为慈善事业筹集一千万！一曲《广州好》使大家耳熟能详。单单粤剧就睇出佢有几撑广府文化 佢表态：“我曾经讲过一句话，边个当左领导，若果让佢（粤剧文化）失落，让佢倒退，让佢慢慢消亡的话。呢个领导要付历史责任！”
黎子流半辈子付出了辛勤嘅汗水，最后祝福呢为老干部身体健康，幸福快乐！
',1)">